#PT201835002

工程一分鐘 #2 — 幾時裝修好啲呢??

幾時裝修好啲呢??
好多時同朋友傾計,都會聽到「我想裝修」、「我諗住裝修」之類既對白。咁到底幾時裝修好D呢?

好多人揀年底裝修, 到底有咩好處同壞處呢?
其實好多人揀年底裝修係因為「人人都係年底裝修」,年底裝修最大好處係可以靚靚仔仔咁過年,壞處係年底係裝修旺季,個個都好忙,好多師傅係呢個時候就會忽略左啲細節,就算本來手工幾好都會扣分,嚴重啲有啲師傅為左趕下一單,而偷工減料都唔算好新奇,除非你可以日日篤住佢做,如果唔係,選擇一間有工程監督既公司,就好有用喇。
又或者你會聽過人講,年頭潮濕裝修唔好呀。啲油漆會唔靚嫁。的確,潮濕天油漆係難做啲,但唔代表會做唔到,只係需要多幾個步驟,同埋要比足夠時間。其實潮濕天油漆難做,好大問題係由於灰底比較難乾。只要你比夠時間佢乾就唔會有大問題。加上年頭比較靜,師傅唔使趕,你又比夠時間,佢都會慢慢做,做靚佢,唔想番手。
所以,幾時裝修其實唔重要,重要係比足夠又合理既時間設計公司,咁樣做出黎就會理想好多。幾多時間係合理呢?以一般600呎左右嘅屋黎講,由你接觸設計公司開始計大約3至5個月左右,其中頭一兩個月係設計出圖揀料呢類準備工夫。施工大約二至三個月,視乎設計會有少少出入。

工程小知識

不鏽鋼之迷 ~ 不鏽鋼真係唔會生鏽?
其實不鏽鋼只係無普通鋼咁易生鏽。一般裝修時會用到既不鏽鋼,其實只係不鏽鋼既小部分。不鏽鋼會用編號分類,數字只係分類,唔係越大就越好,唔同數字主要係唔同用途。
裝修常用會有 200系列(201, 202, 204),300系列 (304, 316),其他用途仲有 400, 500 同600 系列。
例如做鋼閘,室內多數會用 200系列,室外就會用300系列。 300系列防鏽效果會比200系列好,當然亦會比較貴。一般鋼閘公司,如果冇指明就會用200系列,如果做戶外多數會寫明用304,價錢係有大分別,所以訂鋼閘嘅時候就要按自己需要黎揀喇。最後要記住唔好用普通清潔劑抹不鏽鋼,因為大部份都含有令不鏽鋼生鏽嘅成份,由其係酸性清潔劑。要抹不鏽鋼可以用專用清潔劑,或者就咁用半乾濕布抹就可以。

謝夫
#PT201835002