「裝修前準備~暫住、暫存」

裝修前有好多野要準備，其中有兩樣野比較多人忽略。第一係暫住；第二係暫存。
先講第一樣，如果你間屋係住緊想裝修，暫住呢樣野就係你第一樣要考慮嘅野。去邊住呢? 要住幾耐呢? 一般情況，住宅裝修大約需要 2~3 個月，你可能會講 “師傅話個半月起貨 WOR”，無錯可能師傅真係可以個半月起貨，不過計埋你搬出、搬入、執手尾，實質 2~3個月無走雞。

即係話你要搵一個地方可以暫住 2~3 個月，其實住親戚朋友屋企或者酒店都可以，不過同時間你就要諗第二樣野，保留嘅野要點樣暫存呢? 講到保留物品，首先要講，到底你嗰件野係咪真係需要留呢? 一裝修你就會發覺會搵到好多已經幾年冇掂過嘅野，到底係咪要留呢? 呢個話題我地之後再講。講番要搵地方暫存，如果你住酒店或者親戚朋友屋企的話，通常都唔會夠位比你暫存埋啲雜物。所以你可能要搵迷你倉之類黎幫你喇。
呢兩樣野其實會影響你的預算，所以大家都應該計埋呢條數。如果預算鬆動，其實有啲設計公司係可以提供埋暫住同暫存服務，大家搵設計公司時不防可以考慮埋呢樣野。

工程小知識

鏡面霧氣

我相信大家都試過，沖完涼之後，成塊鏡都係水氣。抺完過幾秒又再濛過，想梳個頭都攪一大餐。咁到底有冇方法解決呢?
其實係有嘅，市面上係有一啲鍍膜產品可以令到鏡面唔會有水氣，效果係唔錯的。一般汽車擋風玻璃用嘅鍍膜都可以做到，不過有一個缺點，就係你大約每 3~4個星期就要做一次，同埋唔可以經常抺佢。我相信唔算難處理，所以有呢個問題嘅朋友，不防試試。

謝夫

#PT201839004