#PT201843006

工程一分鐘 #6 — 「與 Designer 行街」

「與 Designer 行街」

相信好多人都有聽過,「Designer 會陪你行街」。咩為之「Designer 會陪你行街」呢?
其實即係 Designer 幫你揀料,唔一定係同你一齊去行街。可以係佢準備左一啲物料比你,等你選擇。
不過一般人都係多心,所以好多時 Designer 就會同客人一齊去揀料、買料。
Designer 幫你揀、陪你揀同你自己去揀,分別係咩呢?首先 Designer 係諗設計嘅時候已經諗左一啲組合,可以配合成個項目嘅整體設計。另外有經驗嘅 Designer 揀料同用料嘅次數非常多,揀料時,除左快,仲可以即時分辨到適唔適合個設計。客人自己揀,好多時會睇中某一樣野,之後就唔再考慮其他可能性。
出現呢個情況好容易會影響整體設計。再嚴重啲甚至會由靚變唔靚,因為一般客人經驗唔多,睇到某一種牆紙嘅樣辦,可能覺得好驚艷。但原來當佢變成一大幅貼左係牆嘅時候就會唔好睇,因為客人缺乏經驗所以唔會有呢種想像力。
既然你揀左個 Designer 幫你做全屋嘅設計,你都應該要相信 Designer 嘅眼光同意見。

 

工程小知識

USB制面
而家好多人裝修時鍾意揀一啲有 USB 嘅制面。當然有 USB 嘅制面好方便,不過小弟就唔係咁推薦大家喇。
有幾個原因,第一呢種制面要將咁多野放入一個咁細嘅空間,出現故障嘅機會自然會多。
第二 USB 技術進步非常快,例如而家有 QC 3.0 之類嘅快叉技術,但係好多 USB 制面都唔支援。更唔好講再新啲嘅 PD 技術。
當然你現在係可以買到最新嘅技術,不過問題係可以新幾耐?係一兩年間 USB 充電技術已經更新左幾次,唔通你打算每年換新制面?
第三就係呢種制面貴仲要唔多款揀。所以我都係建議大家揀番普通制面比較好。

謝夫
#PT201843006

#PT201841005

工程一分鐘 #5 — 「裝修前準備~保留物品」

「裝修前準備~保留物品」

好多人裝修時,都會同 designer 講 「我想要多啲櫃, 多啲收納空間, 因為我好多野。」
上集同大家提過,裝修前要解決物品暫存嘅問題,當然而家可能幾百蚊就可以租個迷你倉放住先。
不過呢個係咪一個最好嘅解決方法呢?
迷你倉可以解決暫存嘅問題,但係暫存只係講緊暫時性,換句話講,裝修時都要預留一啲空間黎放番啲野。
其實有一個更簡單嘅方法 — 就係消滅佢。唔好話裝修,其實每次你執屋,你都會發覺有好多唔等使嘅野。例如各式紀念品,收藏品之類。或者有啲野買左番黎,用左一次就冇再用。只要你將呢類,兩三年冇用過嘅野放棄,你會發覺你多左好多位,少左好多雜物。咁樣做除左可以減少存倉費用,亦唔使刻意再制造一啲收納空間去存放。
至於好有紀念價值,或一啲珍藏,就係同 designer 溝通時,比一個專屬位置佢。咁以後,除左可以有寬敞啲嘅生活空間,亦可以令到設計更加靚。
點決定啲野要唔要呢?近期睇左本書,入面有個方法幾好,同大家分享下。首先,將你所有野分成兩類,一類常用,另一類唔常用。分好之後,等一個月,如果唔常用嗰堆入面嘅野,一個月都冇掂過,就乾脆放棄佢喇。
有冇發覺每次去旅行,就算酒店房好簡單,都會覺得好靚呢?好大原因係因為冇雜物,所以裝修執屋時,不防諗清楚有咩野係可以掉,絕對會對你嘅生活環境有改善。

 

工程小知識

暗門不暗
近年裝修好多人會想整暗門,原因係咩我唔清楚,不過相信好多人係道聽途說,話整暗門靚啲。
到底做暗門係咪會靚左呢?好多時見人做出黎嘅「暗門」,成大條門罅四邊見晒,咁樣真係靚咩?咁仲算唔算暗門?其實做暗門非常考設計師功力,如果功力唔夠,效果一定強差人意。與其做一隻係人都見到嘅暗門,不如光明正大做番見框,效果一定會比較好。

謝夫
#PT201841005

#PT201839004

工程一分鐘 #4 — 「裝修前準備~暫住、暫存」

「裝修前準備~暫住、暫存」

裝修前有好多野要準備,其中有兩樣野比較多人忽略。第一係暫住;第二係暫存。
先講第一樣,如果你間屋係住緊想裝修,暫住呢樣野就係你第一樣要考慮嘅野。去邊住呢? 要住幾耐呢? 一般情況,住宅裝修大約需要 2~3 個月,你可能會講 “師傅話個半月起貨 WOR”,無錯可能師傅真係可以個半月起貨,不過計埋你搬出、搬入、執手尾,實質 2~3個月無走雞。 Continue Reading